Gründerstipend til ny handlegate for lokale produsentar i Valdres frå Valdres Sparebank.
Lykkelege günderar og banksjef frå venstre: Kristine Flatland Larsen, Erika Lystedt, Simon Thunestvedt og banskjef Arnfin-Helge Kvam i Valdres Sparebank.
Simon Thunestvedt, Kristine Flatland Larsen, Bjørn Nylander og Erika Lystedt har gått saman om å søkje – og har fått tildelt – Valdres Sparebank sitt gründerstipend «Støttespiller» på 50 000 kroner. Midlane skal brukast til å realisere eit spennande prosjekt som set lokale produsentar i fokus og fremjar berekraftig utvikling i Valdres.
Ei tillitsbasert handlegate for lokal handel
I første fase planlegg dei fire gründerane å etablere ei «handlegate» for lokale produsentar, frå Lomen til Hemsing Bru. Denne unike handlegata skal bestå av ubemanna, tillitsbaserte boder der bønder, handverkarar, bakarar og andre produsentar kan selje sine eigenproduserte varer direkte til forbrukarane. Konseptet byggjer på tillit og enkel tilgang til kortreiste varer og gir produsentane moglegheit til å tilby produkta sine utan kostbare mellomledd.
Utvikling av hubbar for produsentar i heile Valdres
Etter at handlegata er etablert, ynskjer prosjektet å inkludere fleire produsentar frå heile regionen. Planen er å utvikle såkalla «hubbar» – samlingspunkt der lokale aktørar kan tilby varene sine under ei felles merkevare. Desse hubbane vil styrkje samarbeidet mellom produsentane og gi dei større marknadsmoglegheiter.
Felles merkevare og marknadsføring
Målet med prosjektet er å etablere ein ideell organisasjon som kan fungere som ein felles fasilitator for produsentar av lokalmat og handverk i Valdres. Gjennom ei sterk felles merkevare og målretta marknadsføring ynskjer dei å gjere kortreiste, rimelege lokalvarer meir tilgjengelege både for innbyggjarar og turistar.
Styrkjer reiselivet og gjer Valdres meir attraktivt
Prosjektet har potensial til å styrkje reiselivet i Valdres ved å tilby ei autentisk oppleving som fremjar lokal kultur og berekraft. Samstundes kan det bidra til å gjere dalføret meir attraktivt både for besøkjande og innbyggjarar ved å tilby rimelege og lett tilgjengelege produkt av høg kvalitet.
«Dette prosjektet kan verkeleg gi produsentar i Valdres ein ny plattform for å nå ut til både lokale kundar og turistar,» seier Kristine Flatland Larsen. «Vi er svært takksame for støtta frå Valdres Sparebank og ser fram til å ta fatt på arbeidet.»
Med gründerstipendet på 50 000 kroner har Thunestvedt, Larsen, Nylander og Lystedt fått ein god start på sitt visjonære prosjekt, som har store moglegheiter for å skape verdiar og vekst i regionen.
