No er alt klart for ei ny veke fylt med meistring, idrettsglede og gode opplevingar i Valdres.
(Podkast her eller lenger ned)
Det brakar laust på Beitostølen igjen! Sundag 30. mars går startskotet for Ridderuka 2025, og som vanleg blir det ei veke fylt med smil, snø og sterke prestasjonar frå deltakarar med funksjonsnedsetjingar frå heile verda. Heile moroa kulminerer med sjølvaste Ridderrennet laurdag 5. april, som i år blir arrangert for 61. gong!
På biletet over ser du ein blid og engasjert gjeng du kan høyre i podkasten, samla ved statuen av Steinar Hovi – ein ekte pionér på Beitostølen. Dei deler siste nytt og planar for årets Ridderuke og Ridderrenn. Frå venstre: Redaktør for «Langs Vegen No», Roy Myrland. Styreleiar Tom Bratlie og generalsekretær i Foreningen Ridderrennet, Martin Feiring Sletten.
Ny arena, same Ridder-ånd
I år skjer det ein liten, men viktig endring: Ridderrennet flyttar seg frå dei vanlege, flate myrene ved Helsesportsenteret. Vêret har rett og slett vore litt for ivrig med vårteikna, og snøen har fått bein å gå på.
Men fortvil ikkje – løysinga er rett borti vegen! Beitostølen skistadion stiller sporty opp med flotte løyper og snøsikre forhold. Her har stadionsjef Kjell B. Melbybråten og Viljar Aasan frå Helsesportsenteret – som kan meir om tilrettelagt utstyr enn dei fleste – fått hjelp av gode krefter til å rigge til to knallfine løyper på 1,5 og 2 kilometer. Dei passar både for dei som går ståande og dei som fyk avgarde i kjelke – med gode doseringar og solid underlag.
I verdselitens spor
Og som om ikkje det var nok – dei nye løypene er dei same som Team Pølsa, med sjølvaste Øystein Pettersen i spissen, har brukt i førebuingane til VM! Det gjev årets Ridderrenn ei ekstra stasleg ramme – og kanskje litt ekstra fart i skia?
– Alt på stell!
– Flyttinga har gått heilt smertefritt, seier generalsekretær Martin Feiring Sletten til langsvegen.no. – Takket vere ein rutinert og superfrivillig gjeng, har vi kome i mål utan knirk. Dette er ein organisasjon med 60 års erfaring – og det merkar ein!
Han legg til med eit smil: – Det er jo litt ekstra stas å få konkurrere i dei same løypene som både Johaug, Klæbo, og no også Team Pølsa har brukt!
No er alt klart – for ei veke med meistring, samhald og ekte idrettsglede i Valdres! Ridderuka 2025 er i gang!
